Bloggfærslur mánaðarins, júní 2008
90 ár frá fæðingu móður minnar!
19.6.2008 | 22:07
Fyrir réttum 90 árum, þann 19. júní 1918 fæddist í Krossadal lægri við utanverðan Tálknafjörð,afskekktu býli við ysta haf, móðir mín ,Guðmunda Finnbogadóttir. Hún var næstyngst í stórum systkinahópi, en alls voru þau 10 . Föður sinn missti hún tæplega 5 ára gömul, og leystist þá heimilið upp eins og oft gerðist. Hún var þó svo lánsöm að fá að fylgja móður sinni ásamt yngsta bróðurnum í vistum á ýmsum bæjum í firðinum .
Síðar lá leiðin til Patreksfjarðar við hin ýmsu störf og á húsmæðraskóla á Ísafirði og að endingu í Eyjafjörðinn, þar sem hún kynntist föður mínum á því herrans ári 1946. Gengu þau í hjónaband 22. desember s.á. sem greinir í 100 ára minningu hans hér fyrr á þessum bloggvettvangi.
Í Eyjafirði "fram", á Ytri-Tjörnum, Freyvangi og Tjarnalandi var hennar starfs- og lífsvettvangur úr því næstu tæp 50 árin, þar sem hún ól og kom til manns 10 börnum við skilyrði sem í dag þættu ekki boðleg . Húsnæðisþrengsli og oft ekki úr miklu að spila á tímum skömmtunar og hafta margskonar.
Aldrei minnist ég þó svengdar eða hafa liðið fyrir erfiðar aðstæður ,og mun það engum frekar að þakka en þessari hversdagshetju sem fæddist á sjálfan kvennadaginn 1918,er 3 ár voru liðin frá að íslenskar konur fengu kosningarétt. Hún lést á Kristnesspítala þann 4. ágúst 1996.
Afkomendurnir eru orðnir hátt á sjötta tuginn og ætla þeir að koma saman ásamt mökum á niðjamóti í Freyvangi núna um helgina til að minnast þeirra.
Stjórnmál og samfélag | Breytt s.d. kl. 22:14 | Slóð | Facebook | Athugasemdir (3)