Er trúleysi jafnvel VERRA en einhver djöflatrú, eða trú á einhver önnur óstaðfest hindurvitni??

Um leið og ég óska bloggverjum öllum gleðilegs árs og friðar , get ég ekki annað en velt fyrir mér þessari spurningu!

Af býsnamálflutningi sumra s.k. trúmanna og kirkjunnar þjóna gæti maður stundum ályktað að verra sé að vera það sem kallað er Trúleysingi, heldur en að trúa einhverri óskilgreindri vitleysu.

Sauðarlegt tal um hið kalda tóm trúleysisins sem sé svo mannskemmandi að það hljóti óumflýjanlega að geta af sér verra samfélag en ella, er ofar mínum skilningi.

Held reyndar frekar að trúin sé oft flóttaleið einstaklinga sem hafa lent í einhverri andlegri krísu , n.k. tómarúmi andans af einhverjum óskilgreindum ástæðum. Átta sig svo engan veginn á því að aðrir geti komist í gegnum lífið óbrenglaðir án þess að "frelsast" til einhverskonar trúar.

Þetta er mikill misskilningur. Trúleysi hlýtur að vera hið eðlilega upphafsástand hverrar mannskepnu. Mikilvægt hlýtur að teljast að hver einstaklingur á sinni þroskabraut fái hlutlausa uppfræðslu um veröldina og þau tækifæri sem hún hefur uppá að bjóða í trúarlegum efnum. Ekki sé þrýst á unglinga sem vart hafa þroska til, að taka afstöðu í þessum efnum. Þar sé leið trúleysisins s.k. gefin sem eðlilegur valkostur á við trúarbrögð ýmiss konar.

Verður að segjast útfrá kaldri skynsemi og rökfræði hljóti það alltaf að vera valkostur nr. 1 ! Þ.e. að trúa fyrst og fremst á það góða í hverri skepnu þessa heims og viðleitnina til að halda frið á jörðu.

Grein Hjalta Hugasonar!-Jákvætt eða neikvætt trúfrelsi.

Það þykir líklega mörgum komið nóg af þrasinu um trúarbragðafræðslu og/eða trúboð í skólum. Ég er einn af þeim sem fylgst hefur með þessu þrasi ,sem virðist mest á misskilningi byggt, allavega miðað við tilefnið, semsagt fyrirhugaða breytingu á grunnskólalögum ,þar sem orðið kristið siðferði er fellt niður , og í stað þess er orðalag sem inniheldur í raun allt sem  þetta s.k. kristna siðferði felur í sér og kannske rúmlega það! Er að skilja á forsvarsmönnum kirkju okkar ,að við kristnir höfum einkarétt á því að tileinka okkur góð og uppbyggileg gildi í heimi hér!

Prófessor í guðfræði ,Hjalti Hugason ræðir þetta mál í grein í Morgunblaðinu í gær undir fyrirsögninni "Jákvætt eða neikvætt trúfrelsi.  Hann er greinilega mun skynsamari en margur annar ,leikur eða lærður, sem tjáir sig um málefnið. Þrátt fyrir að Hjalti sé efins um ýtrustu óskir samtaka hinna "trúlausu" um algjört bann við allri trúariðkun í skólum , þá hefur hann greinilega meira umburðarlyndi gagnvart viðhorfum minnihlutahópa í þessum efnum, en margur prelátinn sem nánast vill úthrópa Siðmennt fyrir frekju og yfirgang gagnvart hinum kristna meirihluta!

   "Í ljósi umræðu síðustu vikna um samstarf kirkju og skóla og ýmis mál sem því tengjast má spyrja hvort aðstæður séu raunverulega slíkar í íslensku samfélagi að ástæða sé til að hverfa frá hefð hins jákvæða trúfrelsis. Það virðist alls ekki augljóst. Það skal þó játað að trúfrelsi kallar þá sem þess njóta til ábyrgðar og  leggur þeim þær skyldur á herðar að neyta þess ekki til að hefta frelsi annarra eða gera lítið úr skoðunum þeirra. Þetta er vert að hafa í huga þar sem samfélög eru mjög einsleit trúarlega líkt og gerist hér á landi þar sem allur þorri þjóðarinnar tilheyrir evangelísk-lútherskum kirkjum. Þar verður að gæta þess að þrengja ekki um of að trúarlegum eða trúlausum minnihlutahópum. Þá skiptir stærð þeirra raunar ekki máli nema hugsanlega í þá veru að því minni sem minnihlutinn er því mikilvægara sé að réttindi hans séu tryggð. Það má gera með ýmsu móti en mest ríður þar á almennri tillitsemi og gagnkvæmri virðingu. Neikvætt trúfrelsi þarf hins vegar ekki að vera nærtækasta lausnin þótt hún virðist skilvirk."

Þetta finnst mér vera mergurinn málsins. Því miður hef ég ekki aðgang eða kunnáttu til að sækja greinina í heild sinni hér inn til tilvitnunar, en kannske aðrir geti bætt úr!

Meirihlutayfirgangur!Er það grunnurinn að kristnu siðgæði?

Maður gæti haldið það eftir að hafa hlýtt á og lesið pistla ýmissa stjörnufréttamanna,ritstjóra og annarra , jafnt leikra sem lærðra ,sem hafa tjáð sig um breytt orðalag í frumvarpi , þar sem lagt er til að afnema beina tengingu við kristna trú,eftir athugasemdir tiltekins hóps.

Það er varla hægt að ímynda sér að sumir þessara skríbenta hafi leyft sér að staldra við og hugsa ,áður en þeir sendu frá sér vitleysuna!

Réttur fólks til að ákveða hverju það trúir eða trúir ekki verður ekki af því tekinn með meirihlutaákvörðunum . Sum réttindi eru þess eðlis að meirihlutaákvarðanir fá ekki afnumið þau. Allavega ekki í siðuðum samfélögum.

Komið nú út úr miðaldamyrkrinu svo maður þurfi ekki að skammast sín fyrir að vera alinn upp í kristnum sið!  Sið sem meirhluti þjóðarinnar er skráður fylgjandi á forsendum ónógs valfrelsis gegnum tíðina.

 Sið sem á sínum tíma var lögákveðinn fyrir þjóðina og hefur því óréttmætt forskot á aðrar lífsskoðanir.  Hvar er samkeppnisráð?

Bjóðum Framsókn og Íhald velkomin í skóla og leikskóla Vors lands. Látum Þingmenn þeirra uppfræða ungdóminn og kenna hverjum er best treystandi!

Hver er munurinn á þessu og því að þjóðkirkjuprestar hafi aðgang að skólum til trúboðs?

Framsóknarflokkurinn er jú elsti stjórnmálaflokkur þjóðarinnar og hefur ráðið hér lögum og lofum ásamt þeim stærsta Sjálfstæðisflokknum, hátt í eina öld.

Hverjir eru verðugri til að uppfræða ungdóminn um framsóknarleg íhaldsgildi, sem hafa jú komið þjóðinni á þann stað sem við erum stödd í dag!   BEST Í HEIMI!

Þar fyrir utan hafa langflestir landsmenn til skamms tíma trúað best á boðskap þessara flokka, sem hlýtur að gefa þeim rétt umfram aðra!

Það væri bara hatrömm frekja minnihlutans ,ef aðrir , s.k. smáflokkar færu að amast við þessu!

Að hafa endaskipti á hlutunum!

Össur gerir sig sekan um alvarlegan misskilning á virkni lýðræðisins. 

Það voru sexmenningar s.k. sem spyrntu við fótum gegn yfirvofandi VALDARÁNI Vilhjálms og Björns Inga.

Menn verða að gera sér grein fyrir hvar valdið liggur í sveitarstjórnum sem og auðvitað öllum stjórnum . Það er formlega hjá öllum kjörnum fulltrúum viðkomandi stjórnar en ekki bara hjá oddvitum þeirra.

Getur verið að undirmálsfólk og afglapar hafi ráðið málefnum tryggingarstofnunar gegnum tíðina?

Manni sýnist að þurfi meiriháttar illgirni og/eða heimsku til að skapa þær reglur sem þetta almannatryggingakerfi okkar hefur að leiðarljósi miðað við þau mýmörgu dæmi þar sem sagt er frá, hvernig fólk hirðir aurinn en kastar krónunni í viðskiptum sínum við þetta apparat!

Stórtapaði á að þiggja bætur eftir slys

Vonandi hefst nú vakning með þjóðinni að sporna gegn því "tyrkjaráni" á auðlindum sem stefndi í!

Þetta ,ásamt undirskriftasöfnun í Reykjanesbæ , vekur manni vonir um þjóðarvakningu til að hamla gegn hrifsun auðmanna á landi og auðlindum þjóðarinnar!

Borgarráð samþykkir að hafna samruna REI og Geysis Green

Þráhyggja Seðlabankans líkt og þráhyggja Hafró í fiskveiðiráðgjöf!

Seðlabændur telja sér trú um að endalaust vaxtaokur slái á verðbólgu.

Líklegt að þetta spani hana frekar upp. Hér á landi eru menn svo vanir ábyrgðarleysi í fjármálum ,að þeir halda áfram að slá lán án tillits til vaxtakosnaðar, og velta honum svo út í verðlagið.

 

Verðbólga yfir verðbólgumarkmiði Seðlabankans í rúm 3 ár

Við getum ekki leyft að fáir eigi allar jarðir og auðlindir !

 Alveg fráleitt í heimi sem telur milljarða íbúa,að fáir einstaklingar geti fræðilega eignast allt land og aðrar auðlindir jarðar.

Sama gildir auðvitað í okkar litla landi.Stoppum þessa vitleysu strax!

Mín pólitíska og ábyrga tillaga um ásetning búfjár í haust! (Tilbúið dæmi).

Ég var með 300 ær á fóðrum sl. vetur og frjósemin var góð , eða rúmlega 100 % tvílembdar. Það þýðir að ég er með hátt í þúsund fjár í haganum í sumar. Beitin er ekki of góð vegna kulda í maímánuði og í kjölfarið einhver úrkomuminnsti júnímánuður í mannaminnum hér norðanlands. Mér sýnist því lömbunum ekki fara vel fram og við þetta bætist að heyskaparhorfur eru ekki góðar. Sé ekki fram á að fá næg hey fyrir veturinn!

En þar sem ekki eru líkur fyrir nógum fallþunga í haust, sýnist mér samt skynsamlegt að setja meirhluta lambanna á í haust, lóga í mesta lagi hrútlömbunum, og sjá svo til hvort ég fái ekki margfaldar afurðir næsta haust!  ( Hvaða máli skiptir hvort mér tekst að afla heyja fyrir bústofninn, ég set þetta bara á Guð og gaddinn)!

Tel að hagfræðistofnun háskólans muni styðja mig í þessum útreikningi, að þetta muni skila sér margfalt seinna í minn vasa.